SSH EN ISO 19361:2025

Matje radioaktiviteti - Përcaktimi i aktivitetit të radionuklideve që emetojnë beta - Metoda e provës me numërim shkëndijash në mjedis të lëngshëm (ISO 19361:2025)

Measurement of radioactivity - Determination of beta emitters activities -Test method using liquid scintillation counting (ISO 19361:2025)

Scope

Ky dokument zbatohet për përcaktimin e përqendrimit të aktivitetit të radionuklidve që emetojnë beta duke përdorur metodën me numërim shkëndijash në mjedis të lëngshëm. Metoda kërkon përgatitjen e një burimi shkëndijash, i cili merret duke përzier mostrën e provës me një “koktejl” që lëshon shkëndija. Mostra e provës mund të jetë e lëngshme (ujore ose organike), ose e ngurtë (grimca, filtër ose fletë e hollë).
SHËNIM: Fletët e holla janë mostra, të përshkruara në 8.5, të përbëra nga materiale të ngurta, p.sh. enë të vogla metalike, plastike ose qelqi, ose materiale mbështetëse të bëra nga këto materiale.
Ky dokument përshkruan kushtet për matjen e përqendrimit të aktivitetit të radionuklideve emetuese beta duke përdorur numërimin me shkëndija në mjedis të lëngshëm.
Zgjedhja e metodës së provës duke përdorur numërimin me shkëndija në mjedis të lëngshëm përfshin marrjen në konsideratë të pranisë së mundshme të radionuklideve të tjera emetuese beta, alfa dhe gama në mostrën për provë. Në këtë rast, zbatohet një trajtim specifik i mostrës përmes ndarjes ose ekstraktimit, për të izoluar radionuklidin me interes dhe për të shmangur çdo ndërhyrje nga radionuklide të tjera emetuese beta, alfa dhe gama gjatë fazës së numërimit.
Ky dokument është i zbatueshëm për të gjitha llojet e mostrave të lëngshme me përqendrim aktiviteti që varion afërsisht nga 1 Bq·l⁻¹ deri në 10⁶ Bq·l⁻¹. Për mostrat e lëngshme, është e mundur të kryhet hollimi për të arritur një përqendrim aktiviteti të përshtatshëm për instrumentin matës. Për mostrat e ngurta, aktiviteti i burimit të përgatitur të shkëndijës duhet të jetë në përputhje me kapacitetin e instrumentit matës.
Gama e matjes lidhet me metodën e provës së përdorur: natyra e pjesës së provës, përgatitja e përzierjes shkëndijues – mostër, konfigurimi i pajisjes së matjes, si dhe prania e aktiviteteve bashkekzistuese nga radionuklide ndërhyrëse.
Përgatitjet e pjesës së provës (si distilimi për matjen e 3H, ose sinteza e benzenit për matjen e 14C, etj.) nuk përfshihen në fushën e këtij dokumenti dhe përshkruhen në metoda specifike prove që përdorin shkëndija në mjedis të lëngshëm.