Kodi i Identifikimit Ligjor të Subjektit (LEI) është një kod alfanumerik me gjatësi prej 20 karakteresh, i zhvilluar mbi bazën e standardit ndërkombëtar ISO 17442, të hartuar nga Organizata Ndërkombëtare për Standardizim (ISO) pas krizës globale financiare të vitit 2008. Këto kode financiare, ndonëse të thjeshta në formë, kanë një rëndësi të madhe në trajtimin e sfidave sistemike, përfshirë edhe ato që lidhen me ndryshimet klimatike.
Pas krizës së vitit 2008, u bë e qartë se kompleksiteti i tepruar i instrumenteve, mekanizmave dhe aktorëve financiarë përbënte një pengesë serioze për transparencën dhe stabilitetin. Mungesa e një mekanizmi të unifikuar për identifikimin e subjekteve juridike të përfshira në transaksione financiare në shkallë globale, rezultoi në dobësimin e kapaciteteve mbikëqyrëse dhe të menaxhimit të rrezikut.
Në këtë kontekst, u krijua sistemi LEI, me qëllim rritjen e transparencës dhe përmirësimin e monitorimit të rrezikut në sistemin financiar ndërkombëtar. Kodi LEI mundëson identifikimin unik të çdo subjekti ligjor, duke përfshirë informacione të tilla si emri, struktura e pronësisë dhe lidhjet me entitete të tjera. Të dhënat janë të aksesueshme publikisht dhe falas përmes Indeksit Global LEI.
Përdorimi i LEI-ve kontribuon në sigurimin e të dhënave më të sakta dhe të standardizuara financiare, duke fuqizuar autoritetet rregullatore dhe institucionet përkatëse që të vlerësojnë më mirë rreziqet sistemike, të identifikojnë tendenca të hershme dhe të ndërmarrin masa të shpejta dhe të efektshme parandaluese.
Për më tepër, studimet kanë treguar se përfshirja e gjerë e përdorimit të LEI-ve mund të sjellë përfitime konkrete ekonomike, duke përfshirë një kursim potencial deri në 4 miliardë dollarë në sektorin bankar global, si rezultat i përmirësimit të efikasitetit dhe reduktimit të kompleksitetit operacional.
Së fundmi, kodi LEI ka evoluar edhe në formën e tij dixhitale të verifikueshme (vLEI), një inovacion që mundëson identifikim automatik dhe të sigurt në kohë reale, duke reduktuar ndjeshëm mundësinë e gabimeve dhe duke përshpejtuar proceset transaksionale dhe administrative.
Përtej sektorit financiar, përdorimi i gjerë i LEI-ve është identifikuar si një faktor kyç në ndërtimin e ekonomive të qëndrueshme, të cilat do të varen gjithnjë e më shumë nga të dhëna të sakta, transparente dhe të ndërveprueshme për të adresuar rreziqet klimatike dhe për të shfrytëzuar mundësitë e gjelbra të së ardhmes.
English