DPS ka publikuar standardin SSH ISO/IEC 42001:2023 “Teknologjia e informacionit - Inteligjenca artificiale - Sistemi i menaxhimit”

DPS ka publikuar standardin ISO/IEC 42001:2023, i cili specifikon kërkesat për krijimin, zbatimin, mirëmbajtjen dhe përmirësimin e vazhdueshëm të Sistemit të Menaxhimit të Inteligjencës Artificiale (AIMS) në biznese dhe organizata. Ai është hartuar për të lehtësuar punën e ofruesve ose përdoruesve të produkteve ose shërbimeve të bazuara në inteligjencën artificiale (AI), duke siguruar zhvillimin dhe përdorimin e përgjegjshëm të sistemeve të AI.

SSH ISO/IEC 42001 është standardi i parë në botë i sistemit të menaxhimit të AI, i cili ofron udhëzime të vlefshme për këtë fushë të teknologjisë, që po ndryshon me rritme të shpejta.

Ai ofron metoda për zgjidhjen e sfidave unike që paraqet AI, të tilla si:

• konsideratat etike
• transparenca
• të mësuarit e vazhdueshëm.

Standardi përcakton një mënyrë të strukturuar për të menaxhuar rreziqet dhe mundësitë, që lidhen me AI, duke balancuar inovacionin me mirëmenaxhimin e një biznesi ose organizate.