Standardet: një gjuhë e përbashkët për cilësinë, inovacionin dhe zhvillimin e qëndrueshëm
Çdo vit, më 14 tetor, komuniteti ndërkombëtar i standardizimit kremton Ditën Botërore të Standardeve, duke vlerësuar kontributin e ekspertëve, institucioneve dhe organizatave që punojnë për hartimin dhe zbatimin e standardeve, të cilat mbështesin zhvillimin ekonomik, përparimin teknologjik dhe mirëqenien e shoqërisë.
Standardet krijojnë një gjuhë të përbashkët ndërmjet bizneseve, konsumatorëve, institucioneve dhe tregjeve. Ato ndihmojnë në përmirësimin e cilësisë së produkteve dhe shërbimeve, rritjen e sigurisë, përdorimin më efikas të burimeve, mbrojtjen e mjedisit dhe forcimin e besimit në marrëdhëniet tregtare. Në një ekonomi gjithnjë e më të ndërlidhur dhe dixhitale, standardet janë gjithashtu një instrument i rëndësishëm për inovacionin, transformimin dixhital dhe konkurrueshmërinë.
Standardet në shërbim të biznesit dhe zhvillimit të vendit
Drejtoria e Përgjithshme e Standardizimit (DPS), si organi kombëtar i standardizimit në Shqipëri, punon për adoptimin e standardeve evropiane dhe ndërkombëtare si Standarde Shqiptare (SSH), duke kontribuar në përafrimin me praktikat më të mira ndërkombëtare dhe në mbështetjen e integrimit evropian të vendit.
Për biznesin shqiptar, standardet përbëjnë mjete praktike për përmirësimin e proceseve, rritjen e besueshmërisë së produkteve dhe shërbimeve, përmbushjen e kërkesave të tregut dhe zgjerimin e mundësive për tregti. Ato u japin ndërmarrjeve, veçanërisht ndërmarrjeve të vogla dhe të mesme, mundësinë të përmirësojnë performancën dhe të rrisin konkurrueshmërinë e tyre.
Duke synuar t'i bëjë standardet më të aksesueshme dhe më pranë nevojave të përdoruesve, DPS po punon për modernizimin dhe dixhitalizimin e databazës së standardeve. Një hap i rëndësishëm në këtë drejtim është edhe përkthimi i plotë në gjuhën shqipe i standardeve të përzgjedhura, duke lehtësuar kuptimin dhe zbatimin e kërkesave të tyre nga bizneset dhe profesionistët shqiptarë.
Nëpërmjet mbështetjes së projektit GQSP të UNIDO-s dhe përdorimit të modulit të përkthimit TRADOS, DPS ka mundësuar përkthimin e standardeve të rëndësishme në fusha të tilla si inspektimi dhe certifikimi, siguria e informacionit, barazia gjinore, menaxhimi i energjisë, mbrojtja e mjedisit dhe menaxhimi i cilësisë. Kjo mbështetje kontribuon në forcimin e kapaciteteve institucionale të DPS-së dhe në përmirësimin e aksesit të biznesit shqiptar në standardet evropiane dhe ndërkombëtare në gjuhën shqipe.
Mirënjohje për komunitetin e standardizimit
Zhvillimi i standardizimit është rezultat i bashkëpunimit dhe ekspertizës së shumë aktorëve. Me rastin e Ditës Botërore të Standardeve, DPS shpreh vlerësimin dhe falënderimet për ekspertët, bashkëpunëtorët, anëtarët dhe kryetarët e Komiteteve Teknike, si dhe për të gjitha institucionet dhe organizatat që kontribuojnë në zhvillimin e sistemit kombëtar të standardizimit.
Një falenderim i veçantë i drejtohet projektit GQSP të UNIDO-s për kontributin konkret në dixhitalizimin e databazës së standardeve dhe lehtësimin e përkthimit të tyre në gjuhën shqipe, duke mbështetur modernizimin e shërbimeve të DPS-së dhe rritjen e vlerës së tyre për biznesin.
Në Ditën Botërore të Standardeve, DPS rithekson angazhimin e saj për një sistem kombëtar standardizimi modern, të aksesueshëm dhe në përputhje me zhvillimet evropiane e ndërkombëtare, në shërbim të cilësisë, inovacionit dhe konkurrueshmërisë së biznesit shqiptar.
Gëzuar Ditën Botërore të Standardeve!
English