Organizata Ndërkombëtare për Standardizim (ISO) ka publikuar standardin ISO/IEC 27005:2022 "Siguria e informacionit, siguria kibernetike dhe mbrojtja e privatësisë – Udhëzues për menaxhimin e rreziqeve të sigurisë së informacionit"

ISO/IEC 27005 është një standard ndërkombëtar, i cili është adoptuar në nivel kombëtar si SSH ISO/IEC 27005:2022. Ai ofron udhëzime për menaxhimin e rreziqeve të sigurisë së informacionit, duke mbështetur zbatimin e një Sistemi të Menaxhimit të Sigurisë së Informacionit (ISMS). Ky standard paraqet një model të strukturuar për identifikimin, vlerësimin dhe trajtimin e rreziqeve në fushën e sigurisë së informacionit dhe është i përshtatshëm për zbatim në të gjitha llojet e organizatave.

Në një kohë kur sulmet kibernetike evoluojnë vazhdimisht, menaxhimi efektiv i rreziqeve është thelbësor për mbrojtjen e aseteve dhe sigurimin e vazhdimësisë së biznesit. Standardi ISO/IEC 27005 ndihmon organizatat të zhvillojnë aftësinë për të menduar në mënyrë strategjike dhe efektive përballë kërcënimeve kibernetike që mund të ndikojnë në ISMS-in e tyre. Ai mbështetet në standardet ISO/IEC 27001 dhe ISO 31000, duke siguruar që sulmet kibernetike mund të shmangen para se të ndodhin.

Ky standard ofron udhëzime për të ndihmuar organizatat të përmbushin kërkesat e ISO/IEC 27001 lidhur me veprimet për menaxhimin e rreziqeve të sigurisë së informacionit, si dhe për kryerjen e aktiviteteve të vlerësimit dhe trajtimit të rrezikut në mënyrë të strukturuar.

Përfitimet e zbatimit të këtij standardi për organizatat e të gjitha llojeve përfshijnë:

• Përmirësimin e aftësisë për të identifikuar dhe menaxhuar rreziqet nga sulmet kibernetike;
• Ndihmë në planifikimin e investimeve për menaxhimin e rreziqeve, bazuar në vlerësimin aktual të tyre;
• Sigurimin e mirëmbajtjes së sistemit dhe përmirësimin e procesit të vendimmarrjes;
• Përdorimin e praktikave më të mira ndërkombëtare në menaxhimin e rrezikut.