Bashkohu në Ditën Botërore të Standardeve

14 Tetori shënon çdo vit ditën botërore të standardeve, si një iniciativë e përbashkët e organizatave ndërkombëtare ISO, IEC dhe ITU. Këtë vit, në qendër të diskutimit është përfshirja dhe njohja botërore e roli të standardeve në realizimin e Agjendës 2030 dhe objektivave të zhvillimit të qëndrueshëm, si mjete që rrisin cilësinë qëndrueshmërinë dhe sigurinë e jetesës në të gjithë globin, për faktin e thjeshtë se standardet ndërkombëtare përbëjnë në vetvete zgjidhje praktike dhe ekspertizë të njehsuar në të gjitha fushat.

PSE NDIHMOJNË STANDARDET NË ARRITJEN E ZHVILLIMIT TË QËNDRUESHËM NË PLANET?

1. 17 objektivat e zhvillimit të qëndrueshëm prekin fusha jetike si edukimi, shëndetësia, punësimi, rritja ekonomike, siguria e shërbimeve dhe produkteve, kujdesi për mjedisin, zvogëlimi i pabarazive mes shteteve, arritja e barazisë gjinore dhe respekti për të drejtat e njeriut.
2. Realizimi i këtyre objektivave kërkon ekspertizë, njohuri dhe angazhim praktik në secilën fushë, zgjidhje që ofrohet më së miri nga aplikimi i standardeve ndërkombëtare, si dokumente teknike, të krijuara duke mbledhur ekspertizën më të mirë për t`i shërbyer nevojave të përditshme të jetës, duke unifikuar praktikat mes shteteve të ndryshme, çka kontribuon në krijimin e zgjidhjeve të qëndrueshme dhe në zvogëlimin e pabarazive sociale, ekonomike dhe teknike mes vendeve të zhvilluara dhe atyre në zhvillim.
3. Zgjidhjet teknike që ofrojnë standardet, janë efektive të shpejta dhe të testuara ndaj risqeve potenciale, duke ndihmuar arritjen e sigurt dhe të shpejtë të rezultateve në çdo fushë të jetës, mes mbledhjes së ekspertizave më të mira nga të gjitha vendet e botës për të gjetur rrugë që funksionojnë në secilin shtet pavarësisht nivelit të zhvillimit, rritjes ekonomike dhe aksesit në njohuri.

SI MUND TË BËHEM PJESË E DITËS BOTËRORE TË STANDARDEVE?

1. Lexo një artikull rreth standardeve dhe ndaje informacionin me kolegët dhe miqtë e tu- Edhe leximi i këtij postimi të bën pjesë të Ditës Botërore të Standardeve. Ndaji disa nga faktet që mësove me miqtë apo kolegët e tu.
2. Kliko në faqen zyrtare të organizatës ndërkombëtare të standardeve www.iso.org apo në faqen e Drejtorisë së Përgjithshme të Standardizimit www.dps.gov.al dhe provo të kërkosh një standard mes fjalëve kyçe të fushës që të intereson.
3. Mendo disa mënyra se si mund të aplikosh standardet në veprimtarinë tënde të përditshme ose sugjero aplikimin e tyre te kolegët dhe bashkëpunëtorët- Në këtë mënyrë po kontribuon në përmirësimin e cilësisë së shërbimit të ofruar, në jetët e njerëzve dhe në realizimin e objektivave të përbashkëta të zhvillimit të qëndrueshëm.
4. Na vizito në ambientet e Drejtorisë së Përgjithshme ttë Standardizimit- Mund të bisedojmë rreth standardeve, mundësive të aplikimit të tyre në punën tuaj.
5. Nëse menaxhon apo drejton ndonjë grup punonjësish, organize një aktivitet informues lidhur me standardet- Do t`ju vendosim në dispozicion ekspertizën dhe burimet tona!

Gëzuar Ditën Botërore të Standardeve!