Drejtoria e Përgjithshme e Standardizimit ka adoptuar si Standard Shqiptar (SSH) standardin europian EN 16636, mbi Shërbimet e Menaxhimit të Dëmtimeve nga brejtësit, insektet, mikro-organizmat e dëmshme, etj., i cili përdoret për të përmirësuar cilësinë e këtyre shërbimeve në të gjithë Evropën. Ky standard përmban kërkesa dhe udhëzime të qarta për ofruesit e shërbimeve, për të siguruar se ata japin shërbime profesionale me cilësi të lartë lidhur me menaxhimin e dëmtuesve, duke minimizuar rreziqet në shëndetin e njerëzve dhe çdo ndikim të mundshëm negativ në mjedis__.__
Prania e dëmtuesve (si p.sh. brejtësve, insekteve ose mikro-organizmave të dëmshme) mund të përbëj një rrezik të madh për shëndetin publik, në momentin që ato mund të shërbejnë si një mekanizëm për futjen dhe përhapjen e sëmundjeve dhe alergjive të mundshme tek njerëzit dhe kafshët.
Industria e menaxhimit të këtyre dëmtuesve, momentalisht luan një rol të rëndësishëm në mbrojtjen e shëndetit publik dhe gjithashtu në mbrojtjen e bizneseve dhe ekonomive familjare nga dëmtimet direkte dhe indirekte, shkaktuar nga dëmtuesit në godina dhe elementët e tyre, që mund të rezultojë me humbje domethënëse, si financiarisht ashtu edhe në drejtim të cilësisë së jetës.
Standardi SSH EN 16636, specifikon kërkesat dhe kompentencat që i nevojiten kompanive në mënyrë që të japin shërbime profesionale për menaxhimin e dëmtuesve. Aspektet mjedisore dhe mirëqenia e kafshëve janë marrë në konsiderate gjatë hartimit të standardit, i cili shikon mundësinë e minimizimit të efekteve negative.
Standardi gjithashtu përcakton kompetencat e nevojshme për role të ndryshme që kontribuojnë në ofrimin e shërbimeve të menaxhimit të dëmtuesve (administrative, shitje, përdoruesit profesional, personi teknik përgjegjës). Megjithatë standardi nuk aplikohet në rastin e mbrojtjes së fushave me të mbjella apo në pastrimet dhe dezinfektimet rutinë, të cilat garantohen nga kontrata të rregullta për shërbimet e pastrimit.
Standardi shërben si pikë referimi për shërbimet profesionale, të cilët kanë nevojë të përdorin standarde të larta për menaxhimin e dëmtuesve. Kompetencat dhe kërkesat e qarta që jepen në këtë standard kontribuojnë gjithashtu në drejtim të përmirësimit të imazhit të industrisë.
Drejtoria e Përgjithshme e Standardizimit (DPS)
Rruga “Mine Peza”, Nr. 143/3, 1014 - Tiranë
Kutia Postare Nr. 98
Tel: + 355 (04) 222 62 55
Fax: + 355 (04) 224 71 77
E-mail: info@dps.gov.al
Web site: www.dps.gov.al
Shqip